Читать онлайн полностью бесплатно Дика Кара - Ды мекс монь эрямом истямо? Эли вейке совамо Кенкшень пинге

Переводчик Татьяна Швецова

© Дика Кара, 2021

© Татьяна Швецова, перевод, 2021

ISBN 978-5-0051-1729-8

Создано в интеллектуальной издательской системе Ridero

Сынь ёжос. Кунсолозевинь. Вень асодавикс ды тандавтыця гайтть. Якшамо. Пелян панжомо сельмень. Седеяк пек конясынь. Ды седе паро ули а лексемскак.

«Менельсэнть, паряк, тешттне кирвазсть», – апак учо сась тень мель.

Мейле сась лия: «Сындест, улема, пек ды пек ламо».

«Ламо – те зяро?» – поладовсь превсэнь кортамось.

«Вана бути панжовлинь сельмень, сестэ неевлинь ды весе-весе ловновлинь», – арсезевинь.

Ансяк сельметне а панжтнемат. Маряви, самай те шкастонть косо-бути тосо, чоподасонть, ёзмолдыть пельниця вишка сельме ды понав кувака кичкере пильгине марто покш шанжавт, менельга ливтнить кедьнимилявт, ды эштё кува-бути тувак лызы мезе-бути вельть тандавтыця, ирныця ды пшти кенже марто.

Эйкакшпингстэ монь тонавтсть а пелеме чоподадо. Те, келя, Венть зоровамонзо.

Зярдо сон валги Масторонть лангс, весементь мазылгавты: понгавтни валдо тештеть ды кеверди менелентень Ков. Ды аламо кие ванны мазычинть лангс, ды малав кияк вень шкане а мизолды. Весе удыть. Секс сон нусмакады, тердьсы инжекс Чоподанть, ды сынь налксить кекшнемнесэ ды тандавтнемкасо.

«Эряви учомс, зярдо сы валскесь», – чакась пряс буволдыця арсема.

Мон яла пелинь ды учинь.

Сась мезе-бути лембе, ды мон аламодо ойминь. Ды эно, видьстэ меремс, ансяк аламодыне. Мон тешкас а содылинь, ков понгинь, ды маринь, кода кие-бути лангозон ваны.

– Шумбрачи! – эзинь кирдеве ды эль марявиксстэ, сельмень апак панжо, пшкадинь мон. – Шумбрачи! Кияк мари эйсэнь?

– Мари-мари, – каятотсь кинь-бути вайгелезэ алдо.

– Шумбрачи! – таго меринь мон сэтьместэ ды кунсолозевинь.

– Ды мезть тон мекев-васов шумбрачи ды шумбрачи! Мон шумбран, ды оно уш зярс, потамодо а арсянгак, – одс мерсь кие-бути.

– Тон кие? – кевкстинь мон.

– Ковр Семёнович – персиянь кумбонь раське – пильгеть ало. Энялдан вечкемс, а безардемс эйстэнь.

Мон пек пелинь. Ды теке марто бажинь содамо-чарькодеме. Пек. Сельмень панжомадо мелесь ульнесь инедеяк ине. Ансяк мон яла теньс эзинь муе вийть.

– Тон косат, Ковр Семёнович? – кевкстинь мон.

– Кунсолока, мадам, мон теть меринь уш – пильгалот. Сельметь панжи! – кода-бути сэставтозь пшкадсть каршон алдо.

– Тон тосо ськамот? – яла аштинь-кевкстнинь мон.

– Аволь-аволь. Вана ульть содавикс Эзем патянь ды лия зярыя ялганок марто.

Мон панжинь сельмень. Пургась сокоргавтыця валдо. Оймесь панжовсь Чинть каршо. Истя виевстэ бажазевинь витемс тарадон, судрямс салмукскень ды кармамс весе эриентень мизолксонь каземе!

Варштынь седе пштистэ.

Кевень кузтемапесэнть ацазель кумбо. Сон ульнесь ташто, ансяк икелень парочизэ тешкас неявсь лангозонзо пурнавозь челькенть алдо. Те, улема, самай Ковр Семёновичесь. А те мазыйстэ мендявозь кутьмере ды кшнинь мазый пильгине марто дамась, улема, Эзем патясь. А оно сеть тюсовтне клумбанть лангсо – самай лия ялгатне. Лангозон вансть ды мизолдсть модасто тарныця чувтонь колиинеть – пезэмкскеть. «Эряви шумбракстнемс ды ёвтамс лемем», – арсезевинь мон.