Кажне еҥын, очыни, мый декем икымше йодыш тыгайрак шочеш: «Кузе почеламутым возаш тӱҥалынат?». Вашештем: такшым, шукынжо йӧратымаш нерген почеламутым возат, «музаштым» шокшо шӱм дене кынелтат, а мыйын икымше почеламутем-влак армий радамыште шочаш тӱҥалыныт. Тушто яра жапем шуко лийын, да шочмо вер дечын ушанымемат шке пайжым пыштен. Вуйлатымаш дене проблеме ынже лий манын, марий йылме дене возкаленам. Салтак радам гыч пӧртылмек, возымо пашам кудалтышым, а икмыняр жап гычын руш йылме дене возаш тӱҥалынам.
Кум ий наре шочмо марий йылмем дене возкален омыл. А ончылно мыйым марий самырыктукым слёт вучен. Лач тунам шӱм-чонем марла возаш ӱжын. Адакшым, йӧратымашат шке вийжым пуэн, садлан тудын нергенат почеламут аршаш погынен.
Икымше аршашым лукмо годым почеламутысо йоҥылышым шотеш налын омыл, садлан лудшо-влаклан умылаш изиш нелырак лийын. Кызытсе савыктымаште ончычсо йоҥылышем умыленам, тудым тӧрленам да ош тӱняш луктынам.
«Чон гыч лекше» книга куд ужаш гыч шога. Икымше ужашым «Салтак радамыште» лӱмденам. Тушко мыйын икымше почеламутем-влак пуреныт, куштыжо салтак радамысе илыш, да тушечын шочмо кундемышкем, суртышкем пӧртылмем нерген возкаленам.
«Йӧратымаш» да «А тул йӧрен…» ужаш-влак йӧратымаш нерген каласкалат, кузе шочеш, кузе пыта, да молыжат. «Чонышто неле лиеш гын!» ден «Пурем чонышкет…» мыйын тӱрлӧ амал верч тургыжланымем нерген палдарат.
Илышыште шке верем кычалмылан да йот семын моло вере кузе шкемым шижмем нерген, психологийым шымлаш тӱҥалынам, да вес еҥлан, мо шӱмыш пурен кертеш, палаш тыршенам. Кӧргӧ чонемым колыштын, почеламут-влакым возенам.
Пытартыш «Авылем» ужашыште мый шке шочмо верем нерген ойлем да Урал мландыште илыше-влакым марий йылмынам арален кодаш ӱжам.
Лудмо годым диалект мут-влакым ужаш лиеш, вет шкеже мый Свердловск кундемынсе ялеш шочын-кушкынам. Почеламутым возымем годым мутер-влакат полшеныт. Мутвундым кугемдашлан кӧра тӱрлӧ поэт ден шанче-влакын книгаштым лудын шогенам. Тау!
